بعد ما إتكلمنا عن تحديد الميزانية وقد إيه الموضوع ده مهم ومفيد لتخفيض المصاريف دلوقتى هأكلمكم عن تحديد المنيو
أو التخطيط للمنيو سواء أسبوعى أو كل أسبوعين أو شهرى
أول سؤال : يعنى إيه التخطيط للمنيو؟
هو ببساطة لما زوجك أو أحد من الأولاد يسألك السؤال اللى كتير من الأمهات والزوجات بيعتبروه سؤال متعب للأعصاب …. هنآكل إيه النهاردة؟ بالذات لما فعلا ما يكونش فيه أكل معين
فيه ناس بتخطط للوجبات الثلاثة وكمان السناك يعنى بتقعد مع نفسها تعمل جدول فطار وغدا وعشا وسناك
إحنا فى بيتنا هنا ماشيين بالنظام المصرى يعنى الغدا هو الوجبة الرئيسية فى اليوم والباقى فطار وعشا بيكون ساندوتشات … زبادى … سيريال … يعنى اللى موجود
بالنسبة لبيتنا وطريقة معيشتنا الوجبة الوحيدة اللى أنا شايفاها تستحق التخطيط هى وجبة الغدا لأنها أكتر وجبه مكلفة ومحتاجة مجهود ووقت فى التحضير
وبالتالى أنا بس بأخطط لوجبة واحدة وهى الغدا
السؤال التانى : هأستفيد إيه لما أخطط للوجبات؟
أولا : هتريحى بالك من السؤال السخيف والغلس اللى قلنا عليه اللى عايز يعرف يبص فى الجدول أو على الاقل إجابتك هتكون جاهزة
ثانيا: كلنا بنصحة من النوم شايلين هم الأكل… ومتسربعين عايزين نلحق نطبخ قبل ما الأولاد يرجعوا من المدرسة لكن لما تخططى وتكون كل حاجة جاهزة فى الفريزر هترتاحى من الضغط العصبى والنفسى الناتج عن الموضوع ده
ثالثا: هتوفرى فلوس كتير …. أيوة هتوفرى فلوس فعلا .. مفيش أكل هيترمى أو يتبقى كله معمول حسابه وكمان هتبطلى تجرى تشترى أكل جاهز فى آخر لحظة لأنك النهاردة صحيتى تعبانة أو نفسيتك تعبانة أو حتى ما عندكيش وقت ولا مزاج تقفى فى المطبخ بالقليل خالص هتوفرى تمن الفرخة المشوية اللى بتروحى تشتريها – ودى أرخص حاجة- لما ما يكونش فيه طبيخ فى البيت النهاردة
رابعا: هتوفرى على نفسك الإحساس بالذنب … سيدات كتير بتحس بالذنب لما ما تطبخش وتروح تشترى أكل جاهز … يا إما لأنها بتضيع فلوس كتير يا إما لأنها ما وفرتش أكل صحى ومفيد لأطفالها
أنا مش بأقول إننا ما نآكلش من برة … لأ التغيير حلو لكن لما نكون مخططين له مش كل أسبوع نشترى أكل مرتين وتلاتة من برة
SUPERMAMY says
مدونتك حلوه قوي و الافكار جامده قوي … يا ريت لوعندك جداول موفره للاكل بتاع الاسبوع تنزليها
شكراااااا
moghtarebah says
شكرا جزيلا ليكي سوبر مامى على كلامك الجميل والمشجع … إن شاء الله فى القريب العاجل انزل جداول للمنيو الأسبوعى تابعينا
SUPERMAMY says
شكراااااا ليكي انتي و انا في انتظار المنيو عموما انا بديت استعمل الكوبونات و شغاله كويس معايا و متبعاكي
moghtarebah says
لو فيه ليكي أى سؤال أو واجهتك مشاكل قولى لى على طول ما تخليش حد يوقفك عن إستخدام الكوبونات … مرة بتوع تارجت حاولوا يغلسوا على بس على ميييييييين جبت لهم مديرة الفرع .. هنا بيخافوا على الزبون .. طالما بنشتغل قانونى ما لهمش معايا غير الـ……. واللا بلاش ههههه الطيب أحسن
SUPERMAMY says
هههههههههههههه هو احسن خاحه في البلد دي انك بتعرفي تاخدي حقك و بعدين موضوع الكوبونات دا لذيذ بشكل بتحسي بانتصار كدا لما توفري مبلغ و تشتري الحاجه اللي محتاجها
ربنا يخليكي يااارب و هقول علطول لو لقيت مشكله
SUPERMAMY says
طيب سؤال يا مغتربه يا اختي انا عندي الاولاد مطلعين روحي في الويك اند في موضوع الاكل بصراحه انا مش منظمه زي ما لازم يكون انا هقولك اخر حاجه طلعت بيها و انتي وريني لو شغال و الا عايز يتصلح
9:00 الفطار غالبا سيريال
12:00 ساندوتشات سريعه كدا مع عصير
3:00 سناك في الغالب فواكه
6:00 الغدا
8:00 كبايه لبن و معاها حنه كيك او بسكوت
دا في الوويك اند بس باقي الاسبوع تمام الغدا بيكون حوالي الساعه 5 لانهم بيكونوا جايين من المدارس و كدا
قولليلي لو عايز تعديل او كويس او زياده
moghtarebah says
هممم تمام قوى وحلو جدا فى الويك إند بيكون كده برضه معياي بيفطروا سيريال وبعدها بساعتين ٣ بيجوعوا وفى وقت المدرسة بييجوا ميتين من الجوع على الساعة ٤ بيكون الغدا بتاعهم مش بنعمل زى هنا الساعة ٤ سناك والوجبة الرئيسية ٦ واللا ٧ لا بيآكلوا أول ما ييجوا من المدرسة الغدا وبعد شوية العشا ماشيين على النظام العربى مش الأمريكانى يعني ههههه