من المهم جدا تحديد الميزانية سواء أسبوعية أو شهرية للبيت وللمصاريف الدورية للبيت لأنك بدون ميزانية واضحة ومحددة ممكن تلاقى نفسك بتلعبى لعبة الصيدلية أو بتستخدمى الكوبونات كتير وبدون مراعاة لميزانية البيت وبدل ما توفرى تلاقى نفسك يمكن بتصرفى أكتر مع الكوبونات أو بتشترى حاجات مش لازماكى أو مش هتستخدميها لمجرد إن عليها كوبون توفير
إزاى تعملى ميزانية للبيت؟
أولا : راجعى مصاريفك لشهر أو إتنين فاتوا تقدرى تعرفى تقريبا بتصرفى كام كل شهر من الإحتياجات الأساسية فى البيت ( الأكل- الصابون بمختلف أنواعه – الشامبوهات – الأدوية ) وشوفى بتصرفى كام على اللبس والحاجات التانية وإبدأى بميزانية محددة للإحتياجات الأساسية .
ثانيا : بعد ما عرفتى بتصرفى قد إيه كل شهر إبدأى حطى ميزانية شهرية تقريبية وخليكى واقعية وبلاش تحملى نفسك فوق طاقتها علشان ما تزهقيش وتتضايقى من التوفير يعنى مثلا لو بتصرفى 800 دولار شهريا على الإحتياجات الأساسية إبدأى بالرقم ده قولى أنا هأصرف 800 دولار شهريا على الإحتياجات الأساسية ولو وفرتى يبقى خير وبركة وهيكون دافع ليكى للتحسين
ثالثا: إبدأى تحدى نفسك شهر بشهر … وحبة بحبة يعنى لو بتصرفى 800 ما تقوليش الشهر اللى جاى هأصرف 400 لأ كده كتير وهتتعبى إبدأى مثلا ب 5 فى المية من المصروف أو عشرة وبعدين شوية شوية قللى تانى وهكذا حتى تصلى لهدفك
رابعا: ما تقارنيش نفسك بحد ما تقوليش إشمعنى فلانة قادرة تمشى بيتها ب 300 فى الشهر وأنا لأ وتبدأى تقولى أكيد فيه حاجة غلط لأ كل بيت وله إحتياجاته وطلباته ولو فى شهر ما عرفتيش توصلى للتوفير المطلوب ما تزعليش حاولى الشهر اللى بعده أو يمكن إنتى حاطة تخفيض كبير على نفسك خدى نفسك واحدة واحدة وبالراحة وإن شاء الله فى خلال من 8 إلى 10 شهور توصلى لتخفيض فى الميزانية من 30 إلى 50 % وتيجى هنا وتقولى لنا
يا ريت لو ليكى تجربة ناجحة فى تخفيض ميزانية البيت تشاركونا تجاربكم وإقتراحاتكم
لقراءة باقى الخطوات
الخطوة الأولى : إستخدام الكوبونات من فين أجيب الكوبونات ؟ أمريكـــا – كنــدا
الخطوة الثانية : لعبة الصيدلية ج١ – ج٢– ج٣
الخطوة الثالثة : تحديد الميزانية الأسبوعية أو الشهرية والإلتزام بها
الخطوة الرابعة : التخطيط للمنيو ج١ – ج٢
الخطوة الخامسة : عمل مخزون المواد الغذائية ج١ – ج٢
Leave a Reply