الكوبونات عادة بتيجى مع جرنال يوم الأحد المحلى الخاص بالولاية أو المقاطعة بتاعتك وبيكون شكلها زى كده
طيب إزاى أجيب الجرنال الأسبوعى
1- كلمى الجرنال نفسه
وشوفى إيه العروض اللى ممكن تكون عندهم فى الوقت الحالى وإشتركى ليوم الأحد فقط ( مش محتاجين باقى الأيام الأخبار عندك على الإنترنت) وهم فى الغالب بيكون عندهم عروض خاصة
2- تابعى عروض
GROUPON
ده ويب سايت بيعمل عروض خراافيه كل شوية لكن أغلبها بصراحة للمطاعم والجيم وخدمات الكوافير وكده لكن برضه ساعات بيعمل عروض هايلة على الستورز يعنى مثلا إشترى جيفت كارد لول مارت ب 10 دولار وقيمته عشرين فكأنك عملتى 50% تخفيض على مشتروات ب 20 دولار وهكذا الويب سايت ده بيعمل عروض على إشتراكات المجلات والجرايد برضه
3- شوفى الويب سايت ده
تلاقى ديسكاونت على الجرنال المحلى
4- Dollar store
محل كل شئ بدولار بيبيع جرنال يوم الأحد بدولار
وأخيرا أحب أقول وأنبه محدش يدفع أكثر من دولار ونص فى الأسبوع ( لو لازم تدفعى)علشان الجرنال وإلا يبقى مفيش منه فائدة
بصراحة بقى كل اللى فات ده أنا معملتهوش وما أنصحش حد يعمله إلا لو خلااااااااص مفيش مفر يعنى أدفع فلوس علشان أوفر
أنا أحب الحاجات المجانية
تعالى بقى نشوف الطرق المجانية اللى تجيبى بيها الكوبونات إيه؟
1- Craig’s List
طبعا أكيد كلكم عارفينه إعملى إعلان عليه إنك محتاجة كوبونات يوم الأحد وهتلاقى ناس يبعتوا لك إنك لو عايزاها خديها إما مثلا تخلى زوجك يعدى عليهم كل أسبوعين واللا حاجة على فكرة فيه ناس كتير قوى بترمى الكوبونات ومش بتديها أهمية خالص
2- إسألى الجيران (لو ليكى علاقة بيهم) أو
زملاء زوجك فى الشغل ( شغل زوجى قبل التقشف كانوا بيجيبوا جرنال الأحد)أو أصدقاء ليكم أو مثلا فى الجامع حطى إعلان لو فيه حد ممكن يديلك الكوبونات بتاعته ما تخجليش مفيهاش أى حاجة خليكى فرى وحبى الحاجات الفرى و بلاش عقد
3- لو بتحبوا تروحوا ستارباكس
أو تآخدوا الأولاد ماكدونالدز روحوا يوم الأحد بعد الظهر فيه ناس كتير بتشترى الجرنال وتقرآه هناك وتسيبه على الترابيزة علشان لو حد عايز يقرآه ممكن تلاقى حد سايبه أو إسألى اللى عند الكاونترلو فيه حد ساب جرنال يوم الأحد (أنا ما جربتش الموضوع ده لكن لما كنت بأروح مش بألاقى جرايد خالص بس فيه ناس جربته وعايشه عليه ) ن
4- فتحى عينك وإنتى ماشية فى الستور
بالذاااااااااااااااات ولمارت بيكون حاطط كتير قوى
manufacture coupon
خدى الكوبون على طول ما تعرفيش إمتى هتحتاجيه ما تسيبيش ولا كوبون الطريقة دى أنا أخدت منها كوبونات كتير
5- تابعينى فى السامبلز إن شاء الله
أقول لكم عليها على طول إشتركى فيها على طول وما تتأخريش علشان مش بتقعد كتير ساعة واللا إتنين وتلاقيها خلصت بتجى لك سامبلز على البيت ومعاها كوبونات قيمة جدا للمنتج
6- إطبعى كوبونات الإنترنت للمنتجات اللى بتحبيها
وأنا إن شاء الله على طول هأقول لكم على أى هوت ديل ألاقيه ومنين تطبعى الكوبونات
7- دى بقى ظريفة جدا وعملتها أكثر من مرة
كلمى الشركة أو إبعتى لهم إيميل وقولى إن منتجاتهم حلوة وجميلة وكتكوتة وبتحبيها جدا جدا وإسألى إذا كانوا ممكن يبعتوا لك كوبونات للمنتجات اللى بتحبيها بيكونوا مبسوطين جدا جدا وبيردوا عليكى وبيدولك العروض اللى عندهم حاليا … مرة أنا كلمت شركة أسأل عن منتج ليهم فيه بورك ( خنزير) واللا لأ الست أخدت عنوانى وبعتت لى كوبونات حلوة قوى
على المنتجات اللى أنا بأشتريه منهم يعنى من الآخر هم بيتبسطوا وإنت كمااااااان
8- لو تعرفى حد بيستخدم الكوبونات
أو ممكن تعملى إعلان على برضه كريج ليست لو جت لك كوبونات مثلا مش عايزاها زى كوبونات أكل للكلاب
مثلا وإنت مش عندك كلاب إعملى
coupon exchange
تديلهم كوبونات أكل الكلاب وتآخدى إنت كوبونات لمثلا حفاظات الأطفال لو عندك بيبى يعنى من الآخر حاولى على قد ما تقدرى تكون كوبوناتك ببلاااااااااااش
[…] الأولى : إستخدام الكوبونات من فين أجيب الكوبونات ؟ أمريكـــا – […]