نشاط للأطفال – طريقة عمل خريطة قديمة للكنز

 

النشاط ده ظريف جدا الحقيقة هو كان مطلوب من إبنى إنه يعمل خريطة كنز قديمة فى المدرسة وعملناها وعجبت المدرسين جدا جدا

 

ممكن كمان إستخدام النشاط ده إنك ترسمى خرائط كنز للأولاد وطبعا الكنز ممكن يكون حلويات أو لعب ( من محل الدولار) أو أى شئ تانى تحبيه وترسمى الخريطة ويعملوها معاكى وبعدين ينطلقوا للبحث والتنقيب عن الكنوز اللذيذة

 

كمان ممكن لو عندك حفلة وفيها أطفال تعملوا النشاط ده مع بعض للبحث عن كنوز وتخبيها فى البيت أو فى الباك يارد لو متوفر عندك

 هتحتاجى

ورقة بيضا من ورق الطابعة ( البرينتر) أى سمك مش مهم

قلم ماركر ثابت اللى هو البيرماننت ماركر أو الشاربى زى ما الأولاد بيقولوا عليه فى المدرسة

معلقة نسكافية + القليل من النسكافية البودرة أو ممكن قهوة

عود كبريت

 

أولا : نجيب الورقة ونرسم عليها بالقلم الثابت

الخطوة الثانية :نكرمش الورقة فى إيدينا لتعطى إنطباع إنها قديمة ( نسينا نعمل الخطوة دى ) …. لكن مش مشكلة

 

الخطوة الثالثة :ندوب نسكافية فى القليل من الماء البارد

وبأى فرشة نمسح على الورقة طبعا إبنى غرق الورقة بالنسكافية طبيعى ومتوقع

 

 

الخطوة الرابعة : ممكن ننثر بعض من حبيبات النسكافية على الورقة لتعطى إنطباع إنها قديمة أكثر وعليها بقع

وبعد كده نجيب ورق مناديل المطبخ وننشف الورقة بطريقة التربيت عليها  … برضه نسينا الخطوة دى

 

ونضعها فى صينية بالفرن على درجة ٢٠٠ فهرنهايت وإنتبهى أول ما الأطراف تلتوى تبقى تقريبا نشفت حوالى ٤ دقائق

 

نآخدها فوق الحوض ونجيب الكبريت ( الخطوة دى إنتى اللى تعمليها علشان العيال ما يولعوش فى البيت ) ونحاول نحرق أجزاء من الأطراف

 

وده شكلها النهائى بعد الحرق

 

 

 

 

 

 

 

 

 

 

 

 

 

 

نشاط ظريف وبسيط و غير مكلف والأولاد إتبسطوا بيه وهم بيعملوه

ويبعدهم عن التليفزيون والكمبيوتر