السلام عليكم وأهلا بيكم في وصفة جديدة من مطبخي المتواضع
وصفتنا اليوم من المطبخ المكسيكي وأكيد الناس اللي عايشين في أمريكا يعرفوها كويس لأنها منتشرة ومشهورة هنا أو على الأقل سمعتوا عنها من البوفية بتاع مدرسة أولادكم .. مفيش مدرسة أولادي راحوها إلا وبتقدم إنشيلادا يوم في الأسبوع
إبني الكبير لا يمكن يجرب وصفة أو أكله ما يسمعش عنها قبل كده!!! ودي ميزة وعيب .. ميزة إنه كويس ما يجربش حاجة هنا ما يعرفهاش علشان ممكن يكون فيها حاجة من المحرمات.. وعيب لأني بأواجه صعوبة شدييييدة جدا إنه يجرب أي نوع أكل جديد
الإنشيلادا زي ما قلت لكم بتتقدم في مطبخ المدرسة كل أسبوع ولاحظت إن إبني بييجي اليوم ده ومش بياكل من مطبخ المدرسة وبيقول لي مش بأحبها والكلمة دي في حد ذاتها بتخليني أدور على الوصفة
وطبعا إخواته وراه طالما حسن أفندي قال مش حلوة يبقى الكل وراه مش حلوة
.. قريت عن الوصفة وإخترت وصفة قريبة للطابع بتاعنا وممكن يتقبلها أولادي وعملتها ولاقت نجاح وإقبال كبير حتى من إبني اللي كان معترض عليها إعتراض شديد
الإنشيلادا عبارة عن خبز تورتيا ملفوف ومحشي باللحمة المفرومة وعليه صوص الإنشيلادا المكسيكي ومعاه كزبرة خضرا وبصل أخضر وريتون أسود مقطع وجبنة مبشورة
فيها شبه كبير من الكريب المحشي لكن بتتميز بالطعم والتوابل المكسيكي اللي موجودة بالصوص
التوابل فيها كمون نكهته عالية وبيكون مشطشط بس أنا خففت الشطة وإخترت نوع الصوص يكون مايلد يعني متوسط كمان إستخدمت جبنة موتزاريللا …الوصفات كلها بتستخدم جبنة شيدر مبشورة لكن أنا أولادي بيحبوا الموتزاريللا أكتر
جربوها إن شاء الله تعجبكم … من هنـــا فيديو قصير يوضح طريقة عمل الإنشيلادا

إنشيلادا باللحمة المفرومة
2015-08-05 18:16:38

طبق مكسيكي
للصوص
- ١ م ك زيت
- ١ م ك دقيق
- ١ علبة من الإنشيلادا صوص يمكنكم عمله بالبيت - الرابط بالأسفل
- ٢ كوب مرقة دجاج
- كزبرة خضرا مقطعة - حوالي ربع كوب
- ملح وفلفل
للحشو
- ١ ونص باوند لحمة مفرومة
- بصلة مقطعة
- ٢ م ك زيت
- ٢ علبة جرين تشيليز أو كوب فلفل حراق مقطع
- نصف كوب كزيرة خضرا مقطعة
- ملح وفلفل
- كوب بصل أخضر مقطع
- نصف كوب زيتون أسود مقطع
- ٣ كوب جبنة مبشورة
- ١٢ - ١٤ قطعة خبز تورتيا
Instructions
- في طاسة على النار نسخن الزيت ثم نضيف له الدقيق ونقلب جيدا ثم نضيف صلصة الإنشيلادا
- نضيف مرقة الدجاج ثم الملح والفلفل ونقلب
- نتركه على النار حتى يغلي ثم نهدي النار ونتركه حوالي ١٥ دقيقة حتى يكون سميكا
- في هذه الأثناء نقوم بتعصيج اللحم المفروم
- نسخن الزيت ونضيف البصل المبشور ثم اللحمة والبهارات حتى تستوي
- عند قرب السواء نضيف الجرين تشيليز ونقلب
- نمسح الخبز من الوجهين بالصلصة اللي أعددناها
- ثم نضع بعض من الكزبرة الخضرا والزيتون والبصل الأخضر
- نضع فوقهم اللحمة المفرومة والجبنة ونلف الخبز على شكل رول
- نصف رولات الخبز بجوار بعضها في طبق بايركس
- يصب فوقها المتبقي من الصوص المعد مع المتبقي من كل من الكزبرة والزيتون والجبنة والبصل الأخضر
- تدخل فرن مسخن مسبقا على ٣٥٠ فهرنهايت حوالي ٢٠ دقيقة أو حتى تسيح الجبنة
- تقدم ساخنة وبالهنا والشفا
رابط وصفة صوص الإنشيلادا
- -------------------------------------
- http://www.foodnetwork.com/recipes/emeril-lagasse/easy-enchilada-sauce-recipe.html
مغتربة http://moghtareba.com/