Uncategorized

أخيييييييرا وصلتنى شنطة تارجت بتاعة الخريف جميلة وشكلها جميل

ومحتوياتها أجمل … شامبلز وكوبونات قيمة من تارجت

دى كل السامبلز من داونى وأولويز وكريم جارنيية ورووت أويكنينج شامبو وشاى يوجى وغيرهم

ودى شنطة تارجت بمحتوياتها

يا ريت تكونوا لحقتوها إنتم كمان

سؤال أكيد سألتوه لنفسكم كل مرة تجددوا الإشتراك بتاع كوسكو أو سامز كلوب … هل الشوبينج هناك فعلا بيوفر؟؟؟

 

 

الإجــابة على السؤال ده بسيطة جدا وهى ….. على حسب ؟؟؟

 

طيب على حسب إيه يعنى؟ على حسب هل كوسكو بعيد عنكم واللا قريب.. على حسب عدد أفراد الأسرة

وعمرهم .. على حسب إحتياجات الأسرة وعلى حسب إنتو بتشتروا إيه من كوسكو مثلا

الحقيقة كل مرة أروح فيها كوسكو أقول مش هأروح تانى إلا كمان شهرين .. على ما أنسى المبلغ اللى دفعته هناك

 

هأتكلم عن كوسكو لأنه هو تجربتى الشخصية لأنى ما جربتش سامز كلوب خالص لكن أعرف عائلات عاملين إشتراك فى الإتنين

أول أما جيت هنا كنت مستغربة جدا من السوبر ماركت اللى علشان ندخله لازم ندفع إشتراك ويبقى معانا

كارنية زى كارنية النادى للدخول !!! بصراحة حسيت إنها فكرة غريبة جدا ومحل غريب إنه يقصر الدخول على ناس وناس

ولما دخلته إستغربت من منظره .. وشكل الأرفف مفيش ديكور والمحل عامل زى المخزن كده وشكله مش مريح وبعدين فهمت

إنهم بيعملوا كده لتقليل التكاليف لأن كل دى تكاليف تضاف لثمن المنتج اللى بنشتريه من هناك

 

هل كل شئ فى كوسكو أرخص؟

بالطبع لأ … فيه حاجات رخيصة وفيه حاجات بتكون أغلى من بره لكن اللى بألاحظه إن الكواليتي فى كوسكو

أعلى يعنى الكواليتي بتاعة الأكل … الملابس مثلا .. الوجبات … مش بالضرورة صحية لكن أعلى

 

إيه الحاجات اللى تشتريها من كوسكو؟

دى مجموعة من الحاجات اللى دائما أشتريها من هنــــك

الخس – السبانخ- الزبادى ( ولو إنى ممكن ألاقى سعر أحسن بالكوبونات فى أى ستور تانى) الحقيقة عائلتى من آكلى الزبادى بشراهة

الأجبان – بنشترى القطع ونقطعها فى البيت .. أرخص سعر وجدته فى كوسكو

اللبن – فقط لما سعره يكون معقول – ساعات بيضرب غالى قوى

البيض – برضه لما يكون سعره معقول

الزبدة– دايما أشتريها من هناك

الخميرة الجافة – أحسن سعر من أى مكان تانى

باكيت الفراخ الكورنيش – أحسن سعر عند كوسكو الباكيت فيه ٦ فرخات

الأرز – سواء البسمتى أو الرز العادى المصرى

العســل … الأسماك فى الغالب من هناك لأن الكواليتي بتاعتها ممتازة

ورق التواليت وورق المطبخ والمناديل

الفيتامينات بالذات لأهلنا فى مصر لأنها بتكون كمية كبيرة بتنفعهم لفترة طويلة

البنزين– فى الغالب بيكون عنده أرخص سعر ده غير إننا عاملين الأمريكان إكسبريس بتاعهم وبنآخد كاش باك

 

إيه الحاجات اللى ما نشتريهاش من كوسكو؟

معجون الأسنــان وفرش الأسنــان بأشتريها أرخص بكتير بالكوبونات والعروض بالذات بلعبة الصيدلية

أمواس الحلاقة ومكن الحلاقة بتكون أرخص برضه بره

السيريال لأن برة بيكون فيه عروض طوال العام وكوبونات كتير

اللبان والحلويات – الباكيت بتكون كبيرة جدا جدا وده ضار جدا جدا ثانيا بالكوبونات أوفر

علب التونــا – المكرونات – صوص السباجيتي – الكيك ميكس … وحاجات تانية كلها غالية لأن الكوبونات متوفرة

 

طيب إزاى نخلى الشوبينج فى كوسكو مش خطر على المحفظة بتاعتنا :)؟

 

لازم نحط إستراتيجية للشوبينج فى كوسكو … منها مثلا

 

تجنب المنطقة الوسطى فى كوسكو : المنطقة دى خطيرة فيها كتب وملابس وحاجات تزغلل العين نبعد *

عنها أحسن الكتب موجودة فى المكتبات العامة والملابس ننتظر أحسن كوبونات التخفيض من المحلات

تجنبوا الشوبينج فى كوسكو ومعدتكم خاااوية : يا ريت نآكل قبل ما ننزل علشان ما نشتريش المحل كله *

خلى دايما معانا شوبينج ليست يعنى قائمة بالطلبات والحاجات اللى إحنا فعلا محتاجينها فى البيت أى *

حاجة برة الليست أكيد مش مهمة  ومش هنموت عليها

لو هتآخدوا سامبلز تآخدوها وتمشوا لأن طبعا بيبقى صعب قوى نقول للستات الكبار فى السن اللى *

بيقدموا لنا السامبلز لأ مش هنشترى لأنهم بيكونوا لطفاء جدا

تجنبو أيضا منطقة الإلكترونيات بالذات الكلام للرجالة التلفزيونات والكاميرات و منطقة خطر فعلا *

أما السيدات تجنبوا منطقة أدوات المطبخ … الحلل والسيرفيسات وأدوات المائدة وخلافه *

حاولوا تشتروا الحاجات من الليسته بتاعتكم اللى عليها كوبونات كوسكو فى الفترة دى *

ويا ريت تسيبوا الأولاد فى البيت تجنبا للمشاكل العائلية من شبطان وزعيق وجرى ورا الولاد فى المحل

 

دى كانت مجموعة من ملاحظاتى على كوسكو وأعتقد سامز كلوب هيكون زيه… يا ريت تقولوا لى بتشتروا إيه من هناك

الحقيقة الموضوع ده موضوع شائك وفيه إختلاف كبير بين المهاجرين العرب

وأنا هنا هأتكلم عن المهاجرين المسلمين لأن المرجعية هنا مرجعية دينية

وكل واحد بالتأركيد أدرى بدينه وظروفه وأنا لا أفتى إنما أقول رأيي فقط

قد يعجبكم وقد تختلفون معى لكن فى النهاية أنا أرحب بكل خلاف وحوار

هادئ ومفيد بعيد عن الألفاظ وبعيد عن التعديات على الأديان أو السخريـة

أولا :أحب أقول لكم إنى مش متشددة دينيا – مع إن بعض أصدقائى يضعونى فى هذا الإطار – لكن أنا

بس  بآخد ديني مأخذ الجد يعنى بالعربى كده بأحاول أعمل الحاجات اللى ربنا قال لنا عليها وأتجنب

غضبه قدر الإمكان بالتأكيد لى أخطاء وأخطاء كثيرة كمان

 

ثانيا عيد الهالويين لا أجد فيه شخصيا أى متعة.. فهو ملئ بالصور المرعبة والقبور و وحاجات

مخيفة وأشكالها تخيف أطفالى حقيقي ومزعجة وغير مسلية وبالنسبة لى العيد المفروض يكون

فرحة وبهجة مش خوف وفزع ورعب

 

ثالثا: لا أحب نهائيا أن يقوم أطفالى بالطرق على الأبواب لأخذ الحلوى من الجيران حتى وإن كنت

معهم بالنسبة لى ده بيعلمهم إنهم مفيش مشكلة إنهم يخبطواعلى الجيران كمان أنا لا أعرف نوعية

البشر اللى هنخبط عليها يكون وسطهم شخص غير مظبوط أخلاقيا وممكن يقابل إبنى بعد كده فى

الشارع مثلا ويقول له مش فاكر أنا اللى أعطيتك الحلوى و و ويبدأ يفتح معهم كلام وممكن جدا يضحك

عليهم لو كان شخص مش كويس ودى حاجة مخيفة جدا جدا هنا على الرغم من التحذيرات فى المدارس

ألا يتكلموا مع الغرباء لكن كل شوية يختفى أطفال و حوادث وكوارث فظيعة تنتهى غالبا بموت الأطفال

 

رابعــا : المأخذ الديني على هذا الإحتفال

أنا مش هأتطرق لرأى العلماء لأنكم ببساطة لو كتبتم على جوجل حكم الإحتفال بالهالويين هيطلع لكم مليون

شيخ ومفتى معروف وغير معروف لا يجيز مثل هذا الإحتفال فالحكم واضح لكن تعالوا نفكر سوا شوية

معظم المسلمين وغيرهم مش عارفين أصل العيد وبرضه لو عملتوا جوجل عليه هتلاقوا إن أصله وثنى

وخاص بالأرواح والكلام ده يعنى فى الأصل هو عبادة وثنية ومع إنتشار المسيحية تحول من وثنى

لمسيحي يعنى فى الحالتين أصله عيد ديني وثنى مسيحي .. طيب هتقولوا مفيش حد بيحتفل بيه على إنه

عيد ديني هو بس حجة للبس الملابس الغريبة ولم الحلويات وكل الأمريكان بيحتفلوا بيه من خلال المنظو

ر ده وبس وكذلك المسلمين بيحتفلوا بيه معاهم من منظور المرح فقط للأطفال .. ماشى الكلام .. بس هل

إحنا متأكدين فعلا إن مفيش حد أبدا أبدا بيحتفل بيه دينيا؟ يعنى مفيش حد وثنى بيحتفل بيه على أساس إنه

عبادة ليه؟

متأكدين ١٠٠٪ يعنى.. بالتأكيد لأ … واللى يقول غير كده يبقى بيضحك على نفسه .. طيب ليه نتشارك

معاهم فى عبادة مش بتاعتنا وعبادة لا يراد بها وجه الله سبحانه وتعالى طيب ما إحنا عندنا العبادات

ما نعملها الأول على أكمل وجه وعندنا أعيادنا الكتيرة الجميلة .. نلبس فيها ونآكل حلويات ونشترى هدايا

ونعمل كل اللى نفسنا فيه .. يعني مش ناقصين أعياد

 

خامســا : عايزة أقول لكم إن مش عيب إن الواحد يقول إنه مش بيحتفل بالهالويين بالعكس ده تمسك

بدينكم ومعتقداتكم ومحاولة منكم لتربية أبناءكم التربية الصحيحة … عارفة إنه صعب بالذات فى

المجتمعات الغربية لكن محاولة مننا للرجوع لأصلنا ثم إننا طوول عمرنا عايشين فى بلادنا من غير

هالويين وما جرى لناش حاجة عارفة إن الوضع مختلف لكن نحاول نعلم ولادنا إن أصلهم كده

حاجة كمان تساعدنا .. فيه كتير قوى من اليهود الملتزمين مش بيحتفلوا بالهالويين لنفس الأسباب

إنه مخالف للعقيدة اليهودية ومخالف للتعاليم اليهودية .. طيب أقول لكم حاجة كمان فيه ناس مسيحيين

  أمريكان مش بيحتفلوا بيه .. والسبب إنه عيد سخيف !!! بالتأكيد النسبة أقل.. لكن فيه

 

دى كانت أسبابى البسيطة لعدم الإحتفال ومنع أطفالى من إرتداء الملابس التنكرية وجمع الحلوى

طبعا زى ما قلت لكم كل واحد وله أسبابه وقناعته الشخصية وأتمنى أسمع أسبابكم فى الإحتفال أو عدم الإحتفال بهذا العيد المخيف

Photo Credit

وصلتنى مجموعة من الفرى سامبلز بالبريد كنت عرضتها هنا قبل كده

سامبلز لشامبو وحفاظات كيركلاند وكريم وكوبونات وكوبونات من تارجت

 

أتمنى يكون وصلكم مثلها … يا ريت تشاركونا السامبلز اللى وصلتكم

 

هو برنامج تابع لشركة أمازون المشهورة وهو برنامج قائم على إستخدام الذكاء البشرى يعنى

 

أعمال لا يستطيع القيام بها برنامج كمبيوتر زى إيه؟ مثلا الترجمة باللغى العامية لمختلف اللغات

 

أو اللهجات – التدقيق فى صور معينة لإظهار مثلا الإختلافات – التسجيل الصوتى – الكتابة بخط اليد

 

وهكذا أعمال تتطلب مجهود وذكاء بشرى ولا يمكن إننا نعمل لها أوتوميشن أو ميكنة

 

أولا : لازم تعملوا تسجيل فى الميكانيكال ترك علشان يكون عندكم حساب هناك

 

ثانيا : المهمات المطلوب عملها بيكون إسمها هيتس

 

HIT : Human Intelligence Task

 

ثالثــا : إيه شكل الهيتس

 

فى الأول تفحصوا الهيتس كويس والأحسن إنكم تعملوا بحث ونصيحة منى بقى إدخلوا على المهمات اللى

 

 

مطلوب فيها العربى لأن المنافسة فيها قليلة لكن طبعا زى ما تحبوا .. فى الأول تصفحوا كل المهمات

 

بسرعة علشان تتعرفوا على طبيعة الشغل وبعدين ممكن تعملوا بحث مثلا بالكلمة أو بالسعر مثلا

 

المهمات بيكون شكلها زى كده

 

 

زى ما إنتو ملاحظين المطلوب هو تقييم ترجمة الكمبيوتر لحديث باللغة العربية

 

 

الزمن المتوقع إنجاز المهمة فيه هو ٦٠ دقيقة طبعا ممكن يكون الزمن كبير جدا على

 

 

المهمة وممكن يكون معقول .. والسعر ٣٥ سنت وموجودين منها ٦ مقاطع كل مقطع طبعا

 

 

بيكون بفلوس لوحده ..بتضغطوا على فيو الهيت علشان تشوفوا محتوياته ولما تضغطوا عليه

 

 

مثلا ظهر لنا ده .. دى عبارة عن تيست علشان تشوفوا نوعية الشغل .. طبعا مش بتظهر فى كل المهمات

 

 

وفيه مهمات بيطلبوا منكم إنكم تآخدوا إختبار للتأكد إنكم عندكم الكواليفيكيشن أو المؤهلات اللى تسمح

 

 

لكم بإتمام المهام فى هذا النوع.. المهم إنكم لازم تخلصوا المهمة فى الوقت المحدد لها

 

 

يعنى ما تفتحوش المهمة وتروحوا تعملوا حاجة فى النص لأن مفيهاش زرار توقيف للوقت

 

ملحوظة : ساعات بتلاقوا فى الهيتس مطلوب إنكم مثلا تكون التقييم بتاعكم ٩٠٪ أو أكثر فلما نكون

 

 

لسه عاملين الأكونت مش بيكون لسه عندنا تقييم علشان كده فى الأول دوروا على المهمات

 

 

اللى مش محتاجة شروط والرخيصة مثلا لمجرد إنكم يكون عندكم بروفايل بمجموعة كويسة

 

من المهمات وعندكم تقييم كويس

 

التحصيل : بالنسبة للتحصيل بيظهر لكم بعد ما بتعملوا إرسال للشغل إذا كان تم الموافقة عليه أم لا

 

 

مفيش حد نصاب يعنى أنا لم أصادف أحد عملت له شغل وتم رفضه فكونوا على يقين إنكم لو

 

الشغل مظبوط هتتم الموافقة عليه بدون مشاكل إن شاء الله

 

 

الفلوس بيتم وضعها فى حسابكم فى أمازون ترك وممكن تستخدموها وتشتروا بيها حاجات من أمازون

 

 

وممكن تتحول للبنك أكونت بتاعكم إذا أردتم

 

تجربتى الشخصية : عملت فيه ٢٠ دولار فى تقريبا ١٠ أيام لكن ما كنتش منتظمة وكتير

 

 

من المهمات للأسف كنت أبدأ فيها وما ألحقش الوقت لظروف خارجة عن إرادتى

 

 

 

أسمع عن ناس بتعمل ٤٠٠ و ٥٠٠ فى الشهر لكن محتاج إلتزام منكم … فلو عندكم وقت كويس

 

أعتقد مش أقل من ٤ ساعات فى اليوم هتقدروا إن شاء الله تعملوا مبلغ كويس من أمازون ميكانيكال ترك

 

أتمنى تكون الفكرة عجبتكم واللى يقدر فيكم يطبقها يقول لنا

 

 

لقراءة باقى المجموعة

مقدمــــة

أفكـار لزيادة الدخل – سواج باكس ج١

أفكـار لزيادة الدخل – سواج باكس ج٢

أفكـار لزيادة الدخل – سواج باكس ج٣

أفكـار لزيادة الدخل – بيع كراكيب البيت

أفكـار لزيادة الدخل – بيع كراكيب البيت- ٧ نصائح مهمة

 

أفكار بسيطة لزيادة الدخل – بيع كراكيب المنزل – كريجز ليست

 

أفكـار بسيطة لزيادة الدخل – بيع كراكيب المنزل – أسواق البيع للغير

 

أفكار بسيطة لزيادة الدخل – بيع كراكيب المنزل – الجراج سيل ١٠ نصائح

 

Jingit – أفكار بسيطة لزيادة الدخل

Mechanical Turk أفكار بسيطة لزيادة الدخل

 

ibotta أفكار بسيطة لزيادة الدخل – من