Uncategorized

طبعا الموضوع شارح نفسه … نشاط ظريف وخفيف وسهل للأطفال وهو عمل علامة الكتاب أو البوك مارك لكن بطريقة جديدة ومبتكرة المرة دي هنعمله من دبابيس الورق الملونة وأي شرائط أو خيوط أو بايب كلينرز .. ممكن تستعلموا بدل العيون أزرار أو ترشوا عليها جليتر يعني خلوا الإبداع بتاعهم ينطلق … دي مجموعة عملناها في بيتنا

وهنا البوك مارك إن آكشن ههههه … سهل قوي وظريف وغير مكلف … أتمنى يكون عجبكم

البعض يسأل عن كيفية إستخدام النقاط بتاعتهم الموجودة في بامبرز جيفت تو جرو وهنا هأشرح لكم الطريقة إن شاء الله

أولا :: تدخلوا على الأكونت بتاعكم في بامبرز جيفت تو جرو

ثانيــا :: إضغطوا على كلمة ريواردز

ثالثـا :: هتظهر لكم صفحة للجوائز … إعملوا إستعراض من فيو ريواردز

وأخيرا :: هتظهر لكم صفحة فيها كل الجوائز الموجودة حالية وقيمتها من حيث النقاط

تعملوا آد تو كارت أو تضيفوها لسلة الشراء يعني  إذا كانت نقاطقكم تسمح

لأعتذر منكم على التأخير وأي سؤال يا ريت تقولوا

أوراق تعليمية للصغار لقصة جاك وشجرة الفاصوليا .. داونلود هنـــــا

photo credit

النهاردة آخر يوم في الـ ٧ أيام … النهاردة يوم نفسي  جدا

 

التاسعــة عشــر :: هو إحنــا ليه بنعمل كـده؟

آه صحيح ليه بنعمل كده حد فاكر؟ إفتكري إنك بتعملي كده علشان تساعدي زوجك وتخرجوا من الضائقة المالية وتسددوا اللي عليكم فى الكريديت .. فاكرن واحدة صاحبتنا هي وزوجها وورطة الكريديت ؟ إفتكر إنك بتعمل كده علشان يتوفر معاك مبلغ كويس تقدر تنزل بيه بلدك وتساعد الأهل .. إفتكروا إنكم عايزين تبدأوا تحوشوا لعمل إستثمار أو علشان مساعدة أولادكم مثلا فى الجامعة لما يكبروا وهكذا .. لازم يكون فيه هدف وهدف كبير .. طيب يعني هم ال٥٠ دولا واللا حتى الـ ١٠٠ دولار كل شهر هم اللى هيوفروا ؟ أيوة ما تحقروش من قيمة ال١٠ دولار ولا حتى الدولار .. دى خطوة على الطريق وكل خطوة بتوصل للي بعدها

 

العشـــرون ::ما ننساش حق الفقيـر والمحتـاج

انا بأحاول أعلم أولادي دايما وعلى رأي الدكتور إبراهيم الفقي النتيجة تكون دائما من جنس العمل .ز بمعنى لو عايزين فلوس أكتر يبقى لازم نطلع فلوس أكتر .. لو عايزين سعادة يبقى ننشر السعادة ونبتسم فى وجه الآخر .. من المؤكد إنه هيبتسم فى وجهنا واللا إيه؟ وعلى هذا أوصيكم إنكم كل أما توفروا دولار يكون للفقراء والمحتاجين نسبة منه ودي فعلا أحلى مكافئة إن الواحد يحس إنه على الرغم من قلة موارده إلا إنه ممكن يكون قادر على العطاء بشكل كبير

 

الحاديــة والعشــرون :: كافئــوا أنفسكم

كل فترة ولتكن كل شهر مثلا أو كل أسبوعين لما تلاقوا نفسكم ماشيين صح إعملوا مكافئة ولو بسيطة ممكن قوي نآخد الواد ونآكل آيس كريم برة أو نخرج خروجة حلوة أو تي شيرت بسيط أي حاجة مش ضروري تبقى غالية بس كأننا بنقول لنفسنا وللناس اللي تعبت معانا … شكـــرا على تعبكم وواصلوا المجهود الجميل

 

بكدة أنا أكون خلصت كل اللى إتعلمته وعرفته علشان تظبطوا ميزانيتكم … وأنا لسه بأتعلم وبأصلح وبأعمل فاين تيون .. أتمنى تكونوا إستفدتم ولو عندكم أي إقتراح أتمنى تشاركونا .. أتمنى لكم التوفيق و شكرا على متابعتكم

photo credit

تعالوا بينا نكمل

الخطوة السادسة عشـر :: البحث عن بدائل

نحاول ندور على بدائل أقل تكلفة لتغطية مصاريفنا .. مثلا هنآكل برة طيب ما نشوف مطعم أرخص أو مطعم عامل عرض .. بدل من نآكل بيتزا من برة ما تيجوا نجرب نعملها بنفسنا … بدل ما نآكل لحوم كل يوم طيب ما نجرب البروتين النباتي؟ العدس والفول .. أو مثلا البيض يعني نتحايل على الأسبوع علشان يعدي فى حدود الميزانية المرصودة

 

السابعــة عشـــر ::التخطيط للمنيو

أنا عارفة إني إتكلمت عن الموضوع ده قبل كده .. ومهما قولت لكم عن أهميته فى التنظيم مش هأوفيه حقه .. الواحد ممكن يشتري حاجات كتيرة جدا جدا من غير التخطيط وممكن الخضار يبوظ في التلاجة – حصلت لي أكتر من مرة – لأن مفيشش تخطيط .. طيب ليه … حرام بكل المقاييس خلونا قبل بداية كل أسبوع أو قبل ما تنزلوا تشتروا طلبات الأسبوع نعمل تخطيط للمنيو فى الأسبوع ده صدقوني هيفيدكم كتير

 

الثأمنة عشـــر :: جربوا الكاش

الحقيقة الموضوع ده أنا ما جربتهوش لكن بأفكر فيه وبشكل جدي وناس كتير قوي بتشكر فيه وفي أهميته .. كل شهر هاتوا ظرف وحطوا فيه فلوس وظرف تاني تحطوا فيه المبلغ بتاع كل أسبوع – ويا سلام لو تتحدوا نفسكم وتقللوا كمان من فلوس كل أسبوع بس دي خليها قدام  بعد ما نكون بقينا برو فى الموضوع – وخدوا الظرف وسيبوا الكريديت في البيت وروحوا إعملوا شوبينج هتكونوا قلقانين وإنتم بتشتروا علشان مش عايزين تخرجوا برة الفلوس اللي فى الظرف ودى حاجة كويسة.. عمركم ما هتشتروا حاجة مفيش معاكم فلوسها وهتفكروا ألف مرة قبل ما تحطوا الحاجة في الشوبينج كارت بتاعتكم

 

أشوفكم المرة اللي جاية إن شاء المولى