Amira

 

دي بعض الأفكار لمساعدتكم بالمطبخ أتمنى تستفيدوا بيها

 

المنيو الإسبوعي مهمة جدا في رمضان ولكن المرة دي نكتب قائمة الطعام للفطور والحلويات والسحور أيضا

 

نعصج لحمة مفرومة ونضعها بالفريزر بأكياس للإستعمالات المتعددة مثل صينية مكرونة بالبشاميل أو حتى توضع فوق المكرونة المسلوقة أو مع الخضار وهكذا

 

المحاشي المحاشي على السفرة الرمضانية ممكن جدا نعمل صلصة المحشي نشوح البصل المقطع في الزيت ثم نضع عليه الطماطم المعصورة ولما يغلي نطفي ونضيف البهارات والملح والفلفل ومعهم  خضرة المحشي والنعناع المجفف لو بتحبوه ثم توضع بالفريزر

 

نتبل الفراخ البانية بالخل والبهارات المعتادة ساعتين ثم نضع عليه خلطة البانية  ويرص في صينية ويوضع بالفريزر وبين طبقاته اكياس بلاستيك .. بيطلع من الفريزر على التحمير على طول

 

إعملوا صواني الجلاش باللحمة المفرومة أو الجبنة ومكونات البيتزا وتوضع بالفريزر للعزومات أو تسوى وتقسم قطع وتوضع بأكياس بلاستيك أو علب على حسب الحاجة لما يكون فيه يوم حاسين إن السفرة ناقصها حاجة نطلع منهم ونسخن في طاسة أو بالميكروويف

 

نعمل الصلصة ونشيلها جاهزة بالفريزر نضرب الطماطم في الخلاط ونضعها على النار مع القليل من الزيت والبهارات ختى تتسبك ثم تترك لتهدأ وتوضع بعلب أو أكياس بالفريزر

الدجاج يتبل ببهاراتك المعتادة مع الخل وتقسم فس أكياس بالفريزر وعند الحاجة نطلعها ونضيف عليها بصلة مقطعة مع طماطم وليمون وتشوى بالفرن أو على الجريل ولو هنسلقها نسلقها في ماء مغلي مع فصين حبهان وبصلة

 

كيلو اللحمة نجيبه ونسلقه كله وبعدين نشيل اللحمة من الشوربة ونترك الشوربة على النار تتركز و نتركها تبرد بعد كده تقسم قطع اللحمة على أكياس حسب الحاجة ومعها الشوربة في كل كيس وعند الإحتياح نضع كيس اللحمة بالشوربة معاها ٢ كوب ماء وبعد ما تغلي نضيف لها الخضار والصلصة أو لعمل كباب حلة نضع اللحمة بالشوربة على النار ونتركها تعمل صوص كباب الحلة

 

لو بتعرفي تعملي ممبار يبقى نحشيه ونسلقه ويعدين يتشال بالفريزر وعند الإحتياج نخرجه من الفريزر نسيبه يفك ونسقطه في مية مغليه بها ملعقة صلصة ويتحمر وبالهنا والشفا

 

نشيل الخضار متنضف ومتقطع على الطبيخ ولو بتعملي سلق يتشال متحمر ومضروب في الخلاط ومقسم بأكياس

 

لو بتآكلو خشاف يبقى قسمي الخشاف اللي عندكم لـ ١٥ مرة بحيث نعمل الخشاف يوم ويوم يعني نعد القراصيا والمشمشية وخلافه وتقسم على الأيام علشان نضمن إنها هتكفي

 

كفتة الرز لو بتعمليها بالصلصة يمكن وضعها بالفريزر بعد التحمير في أكياس ثم توضع بالصلصة قبل الأكل وتسخن

 

كفتة اللحمة نتبلها ونعملها صوابع وتوضع في أطباق فويل بالفريزر أو على شكل كور وتوضع بالفريزر .. تخرج قبل السوا فقط نصف ساعة وتسوى بالفرن ويوضع عليها صلصة بعمل داوود باشا

 

نعمل الشربات أو القطر يعني بكمية ونضعه بالثلاجة

 

ممكن نعمل القطايف أو بلح الشام ونحفظها بالفريزر ولما نكون مستعدين نطلعها على القلي على طول ثم الشربات

 

وأخيرا وليس آخرا أول ما ندخل المطبخ نستغفر ونطلب من الله الإستعانة ونجدد النية على إفطار صائم وزيادة المودة بينك وبين أهل بيتك ومفيش مانع نعزم على الجيران بطبق ويا سلام لو كانوا غير مسلمين وتبقى نيتنا عسى أن يهديهم الله بنا

 

دي مجموعة من الأفكار لتبسيط دخولنا المطبخ في هذا الشهر الفضيل يا ريت تشاركونا بافكاركم

 

بدائل للأصناف الغالية

في شهر رمضان تكثر مشترواتنا من اللحوم والدجاج وغيره من الكنافة والمكسرات وقمر الدين وغيره وغيره مما يسبب إرهاق فعلا للميزانية .. ومع ضرورة وضع ميزانية محددة للشهر زي ما إتكلمنا المرة اللي فاتت وأيضا نبحبح فيها شوية يعني نزود ميزانية شهر رمضان قليلا عن شهور السنة لكن خلوني اقترح عليكم بدائل أقل تكلفة مثل

 

اللحمة: بدل ما نستخدم لحمة قطع ممكن جدا نستخدم لحمة مفرومة في الخضار مثلا أو نعصج لحمة ونآكلها كده مع المكرونة وما تنسوش طرق تانية للتوفير في اللحوم

 

صدور وأوراك الجاج المخلية: بتكون أغلى من اللي بالعضم .. ممكن أوي الشهر ده نكتفي بالوصفات اللي بتحتوي على داجا بالعضم أو دجاجة كاملة لأنها بتكون أقل في التكاليف

 

المكسرات : نستخدم الفول السوداني .. لازال طعمه حلو وأرخض من اللوز والجوز والفستق

 

 الزبيب : ممكن نستخدم أي فاكهة مجففة بداله يكون سعرها أرخص عندنا هنا الكرانبري أرخص من الزبيب وشبهه

 

قمر الدين : مكلف وغاااالي نااار .. ممكن نعمله بالبيت زي ما وريتكم من قبل أو نستعيض عنه بالمشمش يعني نعمل عصير مشمش طازج

 

ثانيا : بديل للعزومات

العزومات مطلوبة والتجمعات مطلوبة لأنها تشعرنا بالألفة في الغربة وبلمة الأهل اللي محرومين منها في غربتنا ومفيدة للأولاد علشان يشعروا بروح رمضان الجميلة في التجمع والصلاة

لكن طبعا العزومات بتكون مكلفة جدا جدا والحل بسيط في رأيي بدل ما نشيل العزومة لوحدنا نعمل العزومات بنظام الديش بارتي أو المشاركة .. كل عائلة تجيب طبق والعائلة المضيفة تكتفي بالمشروبات والشاي والشوربة مثلا وباقي العائلات يوزعوا أطباق اللحوم والحلويات وبكدة نبقى إتجمعنا وإتبسطنا وبنفس الوقت محدش فينا وقف يعمل مليون صنف ويتهد في رمضان وما تبقاش ربة البيت المضيف متكسرة ومش قادرة تصلي ركعتين

 

دي بعض البدائل اللي حبيت أتشارك معاكم فيها .. يا ريت لو عندكم أفكار أخرى تشاركونا … ورمضان كريم

 

تحديد الميزانية في رمضان

 

تحديد الميزانية شيئ مهم جدا سواء شهرية أو أسبوعية .. سواء في رمضان أو أي شهر آخر في السنة .. ليه؟ ببساطة لأننا لما بنسيب المصاريف بدون حساب الدنيا بتبوظ وبتتعك مننا

 

نبدأ نشوف مصاريفنا الشهرية كام ومعانا كام على جنب ومتوقعين مبلغ قد إيه مرتب الشهر ده وعلى هذا الأساس نبدأ نحدد ميزانية معقولة لرمضان بدون إسراف وبدون تقتير على أنفسنا علشان ما نشعرش بالتعب أو الحرمان الشديد

 

يستحسن التخطيط لميزانية شهر رمضان من قبلها بفترة مثلا نقول ٤ – ٦ شهور وإستخدام كل ما هو متاح مثلا جيفت كاردز لأمازون نجيبها من سواج باكس أو ممكن جيفت كاردز لتارجت وولمارت نجيبها من النقاط بتاعتنا في ريسايكل بانك

إقرأوا هنــا عن سواج باكس وهنـــا عن ريسايكل بانك

 

بعد ما حددنا الميزانية نبدأ نقتنص الفرص والعروض لشراء المتطلبات اللي وضعناها في لائحة المشتروات أو الشوبينج ليست بتاعت رمضان من سكر- أرز- مكسرات وخلافه

 

القناعة كنز لا يفنى مش ضروري نشتري مكسرات كميات كبيرة وكيس كبير علشان سعر الباوند مثلا أرخص .. خلينا نفكر هل هنستخدم كل ده؟ معلش علشان خاطر نفضل جوة الميزانية وما نخرجش برة وندخل في أرقام كبيرة خلينا على قد باوند من مثلا كل صنف مكسران تحبوا تشتروه ويا ريت نقلل من الحلويات مثلا اللي فيها مكسرات يعني ممكن نعمل بلح الشام- بسبوسة يدون مكسرات أو لقمة القاضي  ونبطل نشتري من برة يكون أحسن الحاجات اللي بالبيت أرخص … وهكذا خلينا في البساطة شكلا وموضوعا

أتمنى تشاركونا أفكاركم لتقليل الإسراف وتظبيط الميزانية في رمضان .. وكل عام وأنتم بخير