Amira

ساعات كده بنصحى من النوم بيكون …. اليوم باين من أوله ونبقى مش عايزين حد حتى يقول لنا صباح الخير

حقيقي ما بيحصلكمش كده؟ أكيد بالذات السيدات … المود بتاعنا بيتغير في ثواني وساعات بنكون متضايقين والواحد مش عارف بالظبط إيه اللي مضايقه ومخليه مش طايق نفسه

لكن عن تجربة فعلا لو مش عارفين إيه اللي مضايقكم مش هتقدروا تعرفوا إلا لما الغضب اللي جواكم والنرفزة تخف شويتين .. هأقول لكم مجموعة من الحاجات اللي تساعدنا شوية من السيطرة على الموقف قبل ما ننفجر في كل اللي حوالينا

 

١- الصلاة وذكر الله

لو إنتم مسلمين ركعتين كده على إستغفار وإن شاء الله الأمور تهدا شوية ولو إنت مش مسلمين صلوا بطريقتكم  … الصلاة بتخلينا نحس إن فيه قوة عظمى مسيرة للأمور في الكون وهي قوة الله وعظمته .. وأكيد ربنا مش هيعمل لنا حاجة فيها شر لينا كله خير إن شاء الله … ممكن تسمعوا إذاعة القرآن الكريم على الإنترنت بتاعة بلدكم هتفكركم بالأهل وكأنكم وسطهم وبتريح الأعصاب

 

٢- الخروج للشمس والهواء

ولو تخرجوا في البلكونة بتاعتكم .. إسمحوا للشمس إنها تلمس وجوهكم والهواء الخارجي … إتمشوا برة البيت شوية ولو ٥ دقائق أو حتى إتمشوا في حديقة البيت إذا كان فيه … ولو عندكم وقت أكتر يا ريت تتمشوا تروحوا أقرب بارك ليكم .. خدوا أولادكم وروحوا هناك هم يلعبوا وإنت تغيروا المناظر شوية… وإنتو برة تأملوا وجوه الأطفال وهم بيلعبوا ومبسوطين أو أشكال الورد أو العصاقير أو أي شيئ جميل .. أكيد هتشوفوا حاجة جميلة تلفت إنتباهكم وتخرجكم من المود

 

٣- شاور + برفان جميل

لو مش عايزين تخرجوا أو الجو مش مساعد نآخد شاور كده ونفرفش ويا ريت لو نلبس لبس حلو ونحط برفان بنحبه والسيدات يحطوا مكياج … يعني التغيير مطلوب والإحساس بالإهتمام بالنفس بيريح الأعصاب وبنحس بقيمتنا عند نفسنا قبل الغير

 

٤- الإطمئنان على الغير

كلموا حد من الأصدقاء أو الأقارب اللي مش بتكلموهم كتير بالذات في أوطاننا .. هيتبسطوا جدا جدا إنكم فاكرينهم وبنفس الوقت إنتم هتتبسطوا إنكم بسطتموهم وهتتكلموا في مواضيع جديدة وهتعرفوا أحداث جديدة يعني نوع من التغيير برضه

 

٥- الإستماع أو مشاهدة شيئ محبب

إسمعوا حاجة محببة ليكم أو ليها ذكريات حلوة … طب تعرفوا أنا ساعات أفتح اليوتيوب وأتفرج على إعلانات التلفيزيون المصري في فترة الثمانينات ههههه بتفكرني بالطفولة بتاعتي في مصر أو مقدمة فوازير نيللي بتاعة زمان أو فيلم لإسماعيل ياسين كانت جدتي الله يرحمها بتحبه قوي قوي وكل أما أشوفه أفتكرها وهي بتضحك فعلا من قلبها عليه وعلى حركاته

 

٦- جربوا وصفة جديدة في المطبخ

شوفوا وصفة جديدة وكلها إختراعات وجربوها … أنا شخصيا أحب الخبيز جدا وفعلا بيشيل من عندي الشد العصبي ولما أكون متضايقة أعمل شوية دقيق على شوية مية وهات يا ضرب … معلش حالات نفسية معقدة حبتين

 

٧- التمارين الرياضية

محدش بيعمل تمارين رياضية وبيكون متضايق بعدها … بالعكس الواحد بيكون مبسوط إنه عمل حاجة مفيدة وبيحسن من لياقته وحالته البدنية .. كمان بتعمل لنا شعور إننا مهتمين بنفسنا وبصحتنا

 

٨- البحث عن الهدووووووووء

ولو ١٠ دقائق فقط … نقفل التلفزيون والراديو والفيسبوك واللابتوب و و و ونسترخي … لو ينفع الأولاد يروحوا عند حد يبقى خير وبركة ما ينفعش يبقى إدوهم أي حاجة يتشغلوا فيها ولو ٥ دقائق … لعب جديدة … عربيات عروسة ألون شخابيط حتى ممكن تطلعوهم البلكونة وتدوهم جردل فيه ميه يلعبوا فيه أو في البانيو يلعبوا بشوية ميه وتروحوا إنتم – بس مش بعيد عنهم- وتقفلوا عينيكم وتعملوا إسترخاء … شدوا الفيشة شوية

 

٩- إقرأوا قصة

قصة مثيرة ومشوقة …أو قصة رومانسية تخرجكم من مود الزهق والإكتئاب .. لو مفيش .. أرسلوا رسالة رومانسية للزوج/ الزوجة لتغيير نمط الحياة ولو قليلا صدقوني بتنفع ورد الفعل بيكون حلو:) لأنها غير متوقعة طبعا

 

١٠- إعملوا حاجة مركونة من زمان

ساعات كتير بيكون نفسنا نعمل حاجة معينة ومفيش وقت … مثلا ترتيب أو تنضيف جزء في البيت …. دولاب معين .. تنضيف العربية أو فيه ناس عندها هوايات رسم مثلا أو كرافت يعملوها هتحسوا بالإنجاز

 

١١-إشربوا قهوة أو مشروب بتحبوه

إعملوا كوب قهوة متميز وإشربوه لو بتحبوا القهوة .. دوروا مثلا على وصفات قهوة حلوة

 

١٢- وإن تعدوا نعمة الله لا تحصوها

ساعات الواحد بينسى قد إيه نعم ربنا عليه كتير … صحة … أولاد… زوجة / زوج صالح … مسكن مريح … تلاجة فيها أكل …دفاية في البرد .. تكييف في الحر … أب وأم على قيد الحياة ربنا يبارك في عمرهم

يعني مش بنبص غير على اللي مش عندنا أو مش معانا أو عندنا مشكلة تبقى هي دي أكبر همنا والدنيا تبقى سودا حوالينا ومفيش حاجة تفرح في الدنيا و و و … الكلام ده بأقوله لنفسي قبلكم .. الحمد لله على نعمه وربنا يجعلنا من الشاكرين الذاكرين

 

أتمنى أكون ساعدتكم و يا ريت تجربوا وتقولوا لي إيه اللي نفع معاكم وإيه لأ ولو عندكم وصفة أو حل تاني يا ريت تشاركونا بيه وربنا يبعد عننا جميعا الهم والحزن