إصنعـ(ـي) بنفسك :: لتخفيف ومقاومة نزلات البرد/ الأنفلونزا

برررررررر … الدنيا برد جدا الشتا ده .. فيه حاجة مش طبيعية أو طبيعية بس أنا بأستعبط …نزلات البرد والأنفلونزا كتيرة والأولاد عندي بيروحوا المدرسة وبيرجعوا محملين بالهدايا والجراثيم الجميلة اللي بتدخل البيت ومش بترضى تخرج منه تاني

الحقيقة من يومين فاتوا جالي دور برد طرحني أرضا بس الحمد لله أحسن بكتير .. إيدي كانت رايحة ناحية الأنتي بايوتيك علشان أخلص – طبعا الأنتي بايوتيك ده متهرب من مصر هههه جايبينه معانا – عادي إحنا فى مصر عندنا الأنتي بايوتيك ده زي البونبوني كده أى حد يجيله أى حاجة يكلم الصيدلية ويآخد الأنتي بايوتيك اللي عاى مزاجه … مش هي دي الديمقراطية برضه ههههه

المهم قلت هأقاوم وقعدت أدور على طرق طبيعية علشان تساعدني فى تخفيف أعراض البرد والتعجيل من الشافء بإذن الله ووجدت طرق جميلة جدا جربتها والحمد لله في يوم واحد لاحظت الفرق

الطرق كلها بتدور حوالين ٤ حاجات موجودين فى البيت وبالتحديد فى المطبخ

 

:: أولا العسل الأبيض

العسل معروف من زمان إنه بيزود مناعة الجسم وفيه مضادات بكتريا ومضادات أكسدة … حاولوا تدوروا على العسل الأورجانيك والمزروع في منطقتكم وكمان اللي مش متفلتر .. يعني ما إتعملهوش فلترة .. أنا تعبت جدا على ما لقيته هنا والحقيقة لقيته فى مكان كان من آخر الأماكن اللي أدور فيها وهو كينج سوبرز أو كروجر يعني .. دورت فى الفارمرز ستورز ما لقيتهوش

:: خل التفاح

خل التفاح الأورجانيك الغير مفلتر فيه حاجة إسمها ” ماذر” وهي مجموعة من الإنزيمات المتكونة خلال عملية التخمر بتاع الخل .. الإنزيمات دي مهمة صحيا وهي اللى بتدي لخل التفاح فايدة كبيرة في العلاج والشفاء

:: القرفـــة

بعض الأبحاث الطبية بتقول إن القرفة فيها مضادات إلتهاب عالية وأبحاث أخرى بتقول إن فيه أنواع منها بتخفض الكوليسترول وضغط الدم ونسبة السكر وخلافه

:: الليمون

الليمون يحتوي على مضادات أكسدة جاية من مادة موجودة فيه إسمها بايوفلافينويدز ده غير إن فيه فيتامين سي

 

:: بعض الوصفـــــات

وصفـــة الليمــــون بالعســــل

طبعا أغلبنا يعرف الوصفة دي من أيام الجدات …وصفة الليمون بالعسل لتخفيف آثار البرد وعلاج الكحة .. تعتبر الوصفة دي دواء كحة طبيعي

٢ معلقة كبيرة عصير الليمون

معلقة كبيرة عسل نحل طبيعي غير مفلتر

 ربع كوب ماء دافئ

الوصفة دي تعملوها على حسب ذوقكم يعني ممكن تزودوا أو تقللوا في المقادير زي ما تحبوا

إشربوها على الأقل مرتين يوميا .. مرة الصبح ومرة قبل النوم لتخفيف الكحة ليلا … حموضة الليمون بتقتل البكتريا وتخفف إحتقان الزور والماء الدافئ بيريح ويهدئ الكحة مع العسل اللي بيقلل من الإحساس بحموضة الليمون وطبعا فوائد العسل السالف ذكرها

العسل الأبيض وخل التفاح

١ معلقة كبيرة عسل خام

١معلقة كبيرة خل تفاح

١ كوب ماء دافئ

لو مش قادرين على طعم الخل أو متضايقين منه حطوا عليه رشة قرفة بتضيع ريحته وإعملوا كمية صغيرة يعني ممكن معلقة صغير ومعلقة صغيرة من العسل على ربع كوب ماء دافئ

خليـط العسل الأبيض مع القرفـــة

القرفة والعسل الأبيض ليهم خواص مضادة للإلتهاب ومضادة للبكتيريا

١ معلقة كبيرة عسل أبيض خام – غير مقلتر- أورجانيك

١/٤ معلقة صغيرة قرفة مطحونة

تخلط مع بعضها وممكن نآكل منها كده أو نحلي بيها أي مشروب أو نخلطها بماء دافئ أو مع طبق بليلة مفيش أحلى من كده

::ملاحظــات أخـــــرى

البصل

لو الأنف مسدود بالليل إقطعوا بصلة وخلوها جنبكم .. ريحة البصل بتفتح الأنف وتستمتعوا بنوم هادئ إن شاء الله

لا تنسوا غسيل الأيدي دوما بالماء والصابون وتبعدوا الأيدي دااائما عن الوجه .. دعك العينين وخلافه*

لما يكون عندكم الدور ما تنسوش تغطوا الأنف والفم عند العطس والكحة*

لما يكون عندكم دور البرد الراحة مهمة جدا جدا مع شرب السوائل بكثرة*

شوربة الدجاج الجميلة الدافئة مع الليمون .. مريحة جدا وتساعد على الشفاء بإذن الله*

لو عندكم أي وصفة تانية يا ريت تقولوا لنا….. نتمنى لكم دوام الصحة والعافية