فضفضة أم :: تحقيق الأهداف.. لحياة أفضل

أول مرة أتعرف على مفهوم تحديد الأهداف وأهميته والسبل إلى تحقيق الأهداف وقوة تحقيق الأهداف كان من الدكتور إبراهيم الفقي رحمه الله .. محاضرات له موجودة على اليوتيوب

في الأول عجبني الموضوع وتحمست لكن كالعادة – وكعادة أغلبنا – يبدأ الموضوع كبير وبعدين كل شيئ يروح لحاله

ولكن … بعد وفاة والدي – رحمه الله-  نظرت لحياتي نظرة مختلفة تماما وبدأت أسأل نفسي أسئلة من نوعية رايحين فين وجايين منين وهنآخد معانا إيه ؟ وحساباتي إتغيرت كتير وبدأت أهتم بوقتي أكتر وأحاسب نفسي – أو أحاول أحاسب نفسي- على كل دقيقة وكل ساعة بأعمل فيها إيه؟

 

سألتني متابعة .. ليه حطيتي أهداف الشهر؟ يعني إيه أنا شايفة إن مالهاش لازمة

طيب تعالوا معايا كده نبص على حياتنا بالذات الامهات

 

كم مرة بتحسي إن اللي بنصبح فيه بنبات فيه؟

كم مرة بتحسي إن الأيام شبه بعضها ومفيش جديد؟

كم مرة نضفتي المطبخ أو الصالة ومفيش ساعتين وترجع تاني متبهدلة؟

كم مرة مثلا كان نفسك تقرأي كتاب بهدوء بدون مقاطعة؟

كم مرة كان نفسك تنزلي وزنك أو تعملي رياضة وكنتي متحمسة وفجأة تبطلي وييجي لك إحباط؟

كم مرة كان نفسك تحفظي قرآن أو تتعلمي شيئ بس ما بتكمليش؟

لو هو ده حالكم .. يبقى الطريق مش واضح.. الأفكار كتير والأحلام كتير لكن الطريق مش واضح وبالتالي الإنجازات غير محسوسة

 : تحديد الأهداف يساعدنا على أن

يكون لحياتنا معنى وده يعطينا الإحساس بالسعادة حتى لو لم ننجز كل الأهداف

لما يكون عندنا هدف نبقى مقبلين أكتر على حياتنا وده يعطينا شعور بالقوة والنشاط غير الخمول والكسل

الشعور بالنجاح : مش معنى إني ست بيت ومش بأشتغل إني ما أقدرش أشعر بالنجاح .. النجاح مش بس في الوظيفة

شغل الوقت فيما يفيد فعلا وتجنب بقى الفرجة على التليفزيون والرغي في التليفون والساعات اللي بتضيع على الفيسبوك

 

كيفية تحديد الأهداف

تحديد الأهداف مش هيكون مرة واحدة .. يعني ما ينفعش أقول عايزة أخس ٥ كيلو الشهر ده فجأة كده بدون تمهيد لأ مثلا أبدأ عايزة أمشي ١٥ دقيقة كل يوم.. هنبدأ على بسيط وهاديكم أمثلة

أمثل لأهداف بسيطة نبدأ بيها

عمل رياضة مرتين في الأسبوع أو ٣ مرات لمدة ١٥ دقيقة *

قراءة في كتاب لمدة ١٠ دقائق يوميا *

حفظ آية واحدة يوميا أو نصف صفحة كل أسبوع*

قضاء ١٠ دقائق مع أولادي كل يوم نتكلم عملوا إيه و،ىخد وندي مع بعض في الكلام *

 

بعد ما نتأكد إننا عملنا كده مثلا لمدة ٤ أسابيع أو شهرين يعني لما تحسول إنه بقى جزء من الروتين اليومي نبدأ نعلى شوية ونزود علشان نوصل للمطلوب

وكل أسبوع لازم نقف وقفة نشوف عملنا إيه وصلنا لفين وفاضل لنا قد إيه ؟ ومفيش مانع أبدا إننا نقيم ونعيد ونكرر المحاولة لو لقينا إن الوسيلة مش صح

مثلا لو الوزن توقف ومفيش نزول في الوزن يبقى نغير الأسلوب نزود الرياضة .. نقلل الأكل أو نتبع دايت مختلف وهكذا

حاجات مهمة لازم نآخد بالنا منها

دايما نبدأ بأهداف سهلة يعني بالعربي خلينا واقعيين وزي ما قلت لكم ما ينفعش أكون بآكل من غير حساب ومش بأعمل رياضة وفجأة أحط هدف أنزل بوزني ١٠ كيلو الشهر ده

لازم نحط أهداف واضحة المعالم يعني مش نيجي نقول أعمل رياضة لأ لازم أقول هألتزم ب ١٥ دقيقة رياضة يومين أو تلاتة أو كل يوم

لو عندنا هدف كبير نكسره لأهداف صغيرة شهرية أو أسبوعية مثلا عايزين نقرأ كتاب معين يبقى كل يوم هأقرا كذا صفحة أو لو فيه سلسلة من الدروس عايزين نسمعها يبقى كل أسبوع هأسمع كذا درس

تحديد الإطار الزمني لتحقيق الهدف : مثلا ما ينفعش أقول أحفظ القرآن وأسيبها مفتوحة لازم أقول في سنة في إتنين في تلاتة

كتابة الأهداف ومشاركتها مع الغير : الدكتور إبراهيم الفقي – رحمه الله- بيقول إن كتابة الأهداف شيئ مهم جدا جدا وفعلا عنده الحق الإنسان بينسى ويتلخبط علشان كده مهم جدا كتابة الأهداف وأنصحكم تعلقوها في مكان واضح -.. على التلاجة .. عند مراية غرفة النوم مثلا

تتبعوا أهدافكم وإشطبوا بالقلم عند تحقيق شيئ منها .. موضوع الشطب ده مريح نفسيا جدا ليه ما أعرفش!!:) بيحسسنا إننا عملنا إنجاز حتى ولو شيئ صغير

الإلتزام والإصرار .. المحاولة وإعادة المحاولة وعدم اليأس .. بيتهيأ لي مفسره نفسها

 

أتمنى أكون جاوبت على سؤال متابعتي العزيزة ويا ريت أكون قدرت أقنعها وأقنعكم جميعا بضرورة وجود أهداف مكتوبة في حياتنا

هنـــا مجموعة من الخطوات كنت كتبتها من قبل لإدارة الوقت يمكن تساعدكم

إن شاء الله كل أسبوع هأتشارك معاكم أهدافي في الأسبوع وبآخر الأسبوع نشوف قدرت أعمل منها إيه وإيه اللي ما كملتهوش منها إنكم تشوفوا الأهداف يمكن تعطيكم دفعة ومنها ألتزم قدامكم علشان أتكسف لو ما عملتش المطلوب يعني بأحط نفسي في كورنر علشان ما أهربش

هل عندكم أي إضافة أو فكرة لتنظيم أفكارنا وحياتنا تحبواتشاركونا؟ يا ريت تكتبوها في التعليقات وأكون سعيدة بكل تعليقاتكم

إستمتعوا بالويك إند