طرق وأفكار جديدة للتوفير: الفكرة الخامسة – في بيتنا صالون حلاقة

أهلا بيكم

اليوم مع فكرة جديدة من أفكار التوفير إن شاء الله تعجبكم وتنال إستحسانكم

فكرة اليوم ناس كتير بتخاف تعملها لكن حقيقة هي محتاجة بس شوية تدريب .. يعني كام مرة كده وهتلاقوا نفسكم برو إن شاء الله بس ما تخافوش توكلوا على الله وجربوها

 

الفكرة الخامسة:: الحلاقة بالمنزل

 

بالذات للصغار .. كل اللي هنحتاجة ماكينة حلاقة ممكن تشتروها من أي مكان أي نوع يكون واخد سمعة كويسة ومكان للحلاقة وإحنا عادة بنحلق في الحمام ولما كانوا الأولاد أصغر كنا بنحلق لهم تحديدا في البانيو

موضوع الحلاقة في البيت ده  مكانش بالنسبة لينا إختيار لأ كان إجبار.. وهأحكي لكم إزاي

 

طبعا إحنا متعودين نحلق للأولاد في مصر عند الحلاق عادي زي كل باقي الناس اللي في مصر لكن لما جينا هنا وأخدنا الأولاد عند محل الحلاقة ما عجبنيش المناظر اللي شوفتها وكمان كان أغلبهم سيدات وما ينفعش زوجي يحلق مع واحدة ست … لما جينا نحجز راجل للحلاقة طلع واحد شكله مش مريح – أتمنى تكونوا فاهمين- وكمان غالي جدا

 

سألنا الناس ودلونا على واحد مغربي تقريبا وحاول زوجي يروح له لكن ربنا أراد إنه يتوه جامد اليوم ده وما يعرفش يروح  وتعب من المشوار واللف والدوران – الكلام ده قبل ما يبقى عندنا جي بي إس – وزهق وقال مش هأروح له تاني وإشترى يومها ماكينة من ولمارت وأنا كنت معترضة جدا هنحلق فين ووجع قلب وتنضيف .. المهم جربنا الأول في الأولاد كالعادة وطلع الموضوع مش بطال هو كان شوارع شوية بس معقول لحد كبير

 

وبعدها إستعوض زوجي ربنا في شعره وإداني الماكينة بعد ما قعدت إتفرجت على يمكن عشرين فيديو وأكثر على اليوتيوب عن الحلاقة للرجال .. وسميت الله وحلقت له وطبعا كانت نص النص بس برضه أحسن من ما تيجي واحدة ست تقص له شعره واللا ييجي راجل ما يفرقش عن الست برضه يقص له شعره

 

ومرة على مرة وكل مرة لازم أقعد أتفرج على اليوتيوب قبل ما نحلق لهم لغاية لما الحمد لله تمرسنا موضوع الحلاقة وموضوع التنضيف بعد الحلاقة

 

طيب لو مش عايزين تتعبوا نفسكم بس عايزين توفروا لسه نعمل إيه

لو مش عايزين تتعبوا نفسكم في موضوع الحلاقة والتنضيف بعد الحلاقة وخلافه لسه ممكن توفروا لكن طبعا مش توفير كبير زي ما تحلقوا في البيت تعالوا نشوف إزاي

 

١- فيه ماكينة حلاقة بتتركب في المكنسة ما جربتهاش لكن سمعتها كويسة على أمازون

 

٢- ممكن تدوروا في كريجز ليست ساعات بيكون عايزين موديل للحلاقة  – برضه ما جربتهاش بس ناس كتير جربو الموضوع ده وكان موفر جدا بالنسبة لهم.. زي الإعلان ده مثلا عندنا

 

٣- ممكن تدوروا في البيوتي سكولز اللي عندكم بيعملوا عروض لتدريب الطلبة وبتكون تحت إشراف متخصصين

 

طيب بالنسبة للسيدات

 

أنا عمري ما جربت اقص شعري بنفسي .. لكن جربت ناس ممكن واحدة تكون بتشتغل في صالون تجميل وتيجي لكم مخصوص تكون مثلا مجموعة من السيدات عايزين يقصوا شعرهم أو يعملوا هاي لايت أو صبغة وخلافه بس طبعا تكون واحدة مأمونة ومعروفة إسألوا حواليكم

ممكن برضه تعملوا بنفسكم أنا جربت قبل كده الحنة أعملها بنفسي وممكن تصبغوا بنفسكم أو تتعلموا تعملوا الهاي لايت

 

هل فعلا بنوفر؟

 

بتعتمد على عدد الأفردا وبتروحوا فين

يعني مثلا إحنا عندنا ٣ أولاد ووالدهم هم دول اللي محتاجين حلاقة كل مثلا شهر أو نقول شهر ونص وأقل سعر لقيته ٧ دولار يبقى المجموع ٢٨ دولار ده لو إعتبرنا إن والدهم هيحلق بنفس السعر وده طبعا مش صحيح لأنه بيكون أغلى يبقى المجموع السنوي ٢٢٤ دولار على الأقل

لو بقى كمان السيدات بيروحوا يعملوا شعرهم ويلونوه كده بندخل في أرقام كبيرة

 

طريقتي المفضلة في قص الشعر للأولاد

كتاب عن الحنة … ويب سايت عن الحنة .. نوع حنة ممتاز .. نوع تاني

 

هل بتقصوا شعركم أو شعر أولادكم في البيت؟ يا ريت تشاركونا تجربتكم وتقولوا لنا بتوفروا قد إيه؟ .. شكرا لكم

لقراءة باقي السلسة من هنـــــا